蘇皓兒30歲生日之旅有艷遇 海邊成功被釣魚男搭訕

啱啱喺4月6號踏入30歲生日嘅Chloe蘇皓兒，飛咗去沖繩叉咗幾日電之後，呢日容光煥發咁出席活動。講起呢個生日之旅，雖然起程時受到台灣地震影響到行程，但係都冇影響Chloe心情，佢仲話因為今次係自己真正一個人去旅行，所以特別開心，加上因為30歲生日，所以好需要一個空間畀自己沉澱下，同時又反思一下自己過去30年做咗啲咩。

Chloe話今次生日之旅，過程中有啲驚險，因為日本當地有海嘯警告，令佢班機要原機折返，最後要10個鐘後先落到機。今次旅程Chloe話重點係潛水，5日入面佢潜足4日，仲喺當地報咗個課程，加上有攝影師跟住幫佢影相拍片，令佢可以喺社交平台同大家share佢嘅快樂。

講到正日生日，佢話朝早潛完水後自己就去咗水族館，夜晚仲一個人去睇煙花。雖然自己一個人去旅行，但Chloe話今次旅程就有艷遇，喺海邊畀個日本釣魚男搭訕，佢哋仲互留咗社交帳號㖭呀！