薛家燕三代同堂旅行感動到眼濕濕 婆孫狂食炸雞冧爆滿載而歸

薛家燕呢日現身一間小學舉辦嘅「與名人對話」活動，接受一眾由學生化身小記者嘅訪問，家燕姐有問必答，一一滿足小朋友嘅好奇心，並大讚佢哋嘅表現得體，之後家燕姐帶領住大家獻唱金曲《皆大歡喜》，全場小朋友手舞足蹈跟住跳唱，場面熱鬧。

眼見小朋友們嘅天真活潑，令家燕姐不禁想起自己童星入行時期，當年只得8歲嘅佢細細個已經好有表演慾，無論係聖誕節或校慶等，家燕姐會踴躍參加舞台演出，回想校園生活溫馨又單純。

家燕姐喺3月底獲子女貼心安排，三代同堂去韓國旅行度過74歲生日，仲同孫仔Julian一齊食咗好多炸雞，整個旅程冧爆滿載而歸，家燕姐對食、住、行程安排有讚冇彈，特別深深感受到子女對佢嘅愛：「每日食唔同食物，行斜路佢哋又即刻埋嚟扶我，照顧有加，望到佢哋嗰種感受好唔同，我都眼濕濕，啲仔女唔知以為媽咪做乜，真係好難得咁錫我，以前嘅辛勞都唔諗，好好享受兒女畀我嘅愛同幸福。」