小S突襲香港 男神劉俊謙伴遊街 對舊愛管有未成年不雅片充耳不聞

徐熙娣(小S)突然現身香港街頭，為佢主持嘅綜藝節目拍攝特輯，引來唔少途人圍觀。而陪伴住小S遊香港嘅正係係男神劉俊謙，見佢哋攬頭攬頸搭晒膊頭，兩人行斜路時，劉俊謙又風度地拖住小S。小S出名鍾意靚仔，之前曾經公開表示因為睇咗劉俊謙有份演出嘅台劇而成為佢嘅粉絲，所以今次有劉俊謙一盡地主之誼，小S嘅心花怒放喜形於色。

小S嘅舊愛黃子佼持有未成年不雅片事件引起熱議，連帶二人嘅舊情亦再被提起，
團隊拍攝期間被傳媒捕獲，立刻爭取機會追問小S近日有冇受連串新聞影響到心情？一向道行高超嘅小S就笑笑口話：「不好意思，我們在工作，來到香港很開心，大家看節目時就會看到我在香港錄影。」

雖然小S冇正面回應事件，但心情明顯唔錯，似乎冇受舊愛嘅負面新聞影響，而今次嘅拍攝除咗劉俊謙之外，小S仲邀請咗另一肌肉型男Tyson Yoshi做嘉賓，兩人更頭貼頭合照，合作得非常愉快，亦盡小S嘅本色。