廖碧兒完成法國碩士課程返港 坦言心態open 隨時ready拍拖

廖碧兒呢日出席一個烹飪慈善活動，支援慈善機構幫助有特殊需要嘅兒童，Berinice喺活動上同兩位可愛嘅小廚師一齊製作蛋糕，佢話自己整得好開心，因為自己好鍾意小朋友，以前都成日同家姐同埋細佬嘅小朋友喺屋企整嘢食，既然咁鍾意小朋友，Bernice應該好想生個屬於自己嘅小朋友？不過佢就話呢啲嘢冇得勉強，所以依家唯有養住狗仔先喇！

近兩年少咗見Bernice喺香港幕前出現，原來佢啱啱完成咗喺法國嘅碩士課程，依家可以多返啲時間喺香港，自己都希望可以多啲出席活動。

過去兩年Bernice專心學業，感情方面就繼續係一張白卷，依家學有所成，應該可以拍拖啦？Bernice大方承認身邊朋友好落力幫佢介紹對象，自己嘅心態都好open，至於擇偶條件，Bernice就最重視溝通，同埋要識得氹佢開心，如果仲識得煮嘢食就更加加分啦！