與李家鼎現身籃球嘉年華 劉穎鏇大讚龍獅酥猶如藝術品

劉穎鏇同李家鼎呢日現身維園，參觀4月12至14號舉行嘅《3X3籃球嘉年華》，眾所周知Tiffany係籃球愛好者，但唔講唔知，原來廚藝了得嘅鼎爺對籃球都好有研究，鼎爺話3對3籃球賽最刺激嘅地方係因為人少，所以選手冇得偷雞，而Tiffany就話自己多數係玩傳統5對5籃球，不過佢就好佩服3對3嘅籃球選手，因為對體能嘅要求更高。

3對3籃球賽源於街頭文化，今次主辦方仲將街頭特色美食引入嘉年華，等大家睇波嘅同時又可以大飽口福，當中尤其以龍獅酥最令Tiffany同鼎爺印象深刻，鼎爺出名刀功好，但佢都話整龍獅酥嘅難度絕對非一般，而Tiffany就讚嘆完成品好似藝術品，自己完全唔捨得食呀！