炎明熹3場個唱重新啟動 新服裝改歌單再踏舞台

炎明熹 去年因為受颳風影響而要取消尾場嘅首次個人演唱會，事隔近半年之後再次舉行，今次更將補場同加場一共演出3場。星期五晚開騷之前，唔少「Gi炎粉」已經喺會場外佈置好唔同打卡點，比歌迷影相留念，仲有人帶埋自製唔同造型嘅公仔到場應援。

Gigi一開場就接連演唱多首歌曲，又同嘉賓 馮允謙 合唱《報復式浪漫》，仲跟Jay Fung學點樣向台下觀眾派心心。事後Gigi就話一向都鍾意Jay Fung嘅作品，仲非常欣賞對方，更加不時會向佢請教，呢日仲準備結他孭帶做禮物，又為佢簽名留念。

上次演出時坦言非常緊張嘅Gigi，又指今次再踏舞台放鬆唔少，估計係汲收咗上次經驗所致，仲話之後場次會繼續加油呀。至於今次服裝亦有唔少改動，Gigi就話非常滿意唔同款式風格嘅打扮咁話。

今次加入成為音樂團隊成員嘅《聲夢》同伴 林智樂 ，亦有同Gigi合唱一曲，事後Felix就指同一齊成長嘅Gigi合作非常有趣，仲話自己一樣渴望有機會舉辦個人音樂會呀。