梁詠琪首個小巨蛋騷開鑼 突然宣佈7月再舉行台北演唱會

梁詠琪首個台北小巨蛋演唱會13號晚舉行，除咗老公同囡囡都有飛到台灣支持外，徐若瑄、溫昇豪、楊千霈、音樂人李思菘，以及長居新加坡嘅楊采妮、李心潔、許茹芸亦有到場見證Gigi攻蛋時刻。
Gigi不少好友亦有到場支持。
早前花蓮發生地震，一直關注災情嘅Gigi，喺演唱會甫開場時，親筆寫咗段文字向災民送上衷心祝福：「人生無常，天災無情。衷心向花蓮地震遇難者的家屬表達深切的哀悼，願逝者安息。也向所有救援人員致最高敬意。在此祝願大家健康、平安！」
Gigi親筆寫咗段文字向地震災民送上衷心祝福。Gigi為台北場歌迷設計獨一無二嘅專屬「全國語」歌單。
演唱會以「時間遇上我們」為主題，分成昨日、今日、明日嘅時間軸，Gigi為台北場歌迷設計獨一無二嘅專屬「全國語」歌單。當唱到金曲《短髮》時，Gigi唔只同全場歌迷一齊大合唱，佢仲表示：「謝謝時間，在我20歲那一年，把我從香港帶來台灣，這首歌給我帶來很多很多的回憶，我在這裡遇到很多美好的人，美好的事情，有時候我會感到孤單和迷惘，但我很感謝有你們的陪伴，讓我可以走到現在。二十幾年過去，希望我的歌聲，可以一直陪伴著你們。」
Gigi突然宣布 7 月將再於台北舉行演唱會。
雖然唱足3個鐘，但台下歌迷依然未滿足，Gigi喺台上表示：「我已經把台北的歌單，變成全百份百國語歌，但還是很多歌曲塞不進來，今天真的唱不完，我們下次演唱會，把今天沒唱的歌都唱，好不好，這個演唱會在什麼時候？今年7月好不好？」起初歌迷仲以為Gigi係講笑，點知佢即刻認真咁話自己已經訂好場地，宣佈7月將舉行side track演唱會，令歌迷們興奮不已。為咗留喺呢個登上小巨蛋嘅重要時刻，臨完場時Gigi提出同全場過萬觀眾一起大合照，好好紀錄這個重要時刻。
Gigi與過萬觀眾大合照。Gigi囡囡同老公都有飛到台灣支持。楊采妮、梁詠琪、許茹芸及李心潔。