全新頻道「TVB Plus」下周一(4月22號) 上午六點正式啟播 ，今日特別舉行記者會公布節目安排，「TVB Plus」係一個結合 J2 台同財經體育資訊台精選內容嘅全新頻道，內容多樣化包括：戲劇、綜藝節目、體育同資訊性節目。
唔少主持亦現身記招推介一系列自家製節目嘅精彩內容，其中嘅重頭節目一定係由梁思浩、黃耀英同黃紫恩主持嘅《直播靈接觸》，作為香港電視史上首個靈異直播節目，幾位主持連出場方式都零舍陰森呀！思浩更透露經已收到兩萬多個求助留言，黃紫恩大讚同思浩及黃耀英嘅主持組合相當之有化學作用，因為佢同思浩係兩位修道者遇上無神論嘅黃耀英，經常因為觀點唔同而擦出火花。節目亦會喺22號頻道開播當日播出。
旅遊類型嘅節目就有《動物森友島》、《台灣萌萌的》、《怪宿宿》、《港女野人奇異記》同埋《自然系男子旅行》，張馳豪(Aska)今次就會拍住細佬張馳杰(Oliver)主持節目《自然系男子旅行》， Aska透露節目有真人騷元素兩兄弟會進行自力更生式野外旅行，細佬Oliver憑爆肌身形獲得過全球先生亞軍，佢都話經已準備好喺節目度騷肌，不過Aska就反而話自己放棄準備反其道騷腩肉。
飲食相關嘅節目就有《尋醉蘇格蘭》、《我們家的料理》，以及由兩位前新聞主播黃婉曼同蔡雪瑩等共同主持嘅《美食新聞報道》，蔡雪瑩透露雖然宣傳片時見到大家回歸主播Mode好正經咁報道美食情報，但其實節目中主持們亦會私心分享同搞下Gag咁。大隻仔李爾晨獻出佢嘅第一次主持節目《尋醉蘇格蘭》，佢更自爆拍節目時幻想自己係《衝上雲霄》嘅Cool魔希望邂逅佢嘅Holiday。
《港女野人奇異記》嘅主持胡美貽(Nicole)，近日傳出同謝玲玲嘅兒子拍拖，不過Nicole就話自己現階段以事業為重，對新戀情表現相當口密，被問同準奶奶謝玲玲社交平台互相關注，感情唔錯，Nicole以好友相稱，話同唔少人關係都唔錯，更希望無論工作同感情都係低調處理。另外TVB Plus亦會結合三大平台myTV super，tvb.com以及鄰住買﹐加強同觀眾嘅互動。