斯文待人新歌名被Wyman冠名 馮允謙拍MV靠零食氹小朋友

日前應邀為 炎明熹 演唱會擔任嘉賓嘅 「唱作王子」 馮允謙 推出新歌《JAY FUNG儀態訓練學院》，一向形象斯文淡定嘅佢，今次就吸引到作填人 黃偉文 新歌嘅創作靈感，就連歌名都加入埋佢嘅名字。

馮允謙嘅新歌《JAY FUNG儀態訓練學院》被黃偉文冠名

導演拍攝MV時安排一間高級餐廳作場景，Jay安坐其中一張餐枱，突然一班瘋狂食客爭相搶奪食物，連櫈都被撞跌，衝過Jay身邊時仲幾乎將佢扯埋落地，Jay繼續保持儀態，最後見到一位小朋友同自己一樣冇跟風狂搶食物，於是上前拖住小男孩離開。

Jay仲以零食成功同小演員Marcus打開話匣子

Jay仲透露，埋位前曾略施小計同小演員Marcus混熟，佢話：「之前拍微電影曾經同小朋友合作過，拍MV就係第一次，其實我都係個大細路，同小朋友做對手戲最緊要係要同佢做朋友，先至有默契。同事準備咗好多零食，雖然我要Keep fit無得食，但我就攞去同小朋友做朋友。」除咗零食攻擊，Jay哥哥亦溫柔咁同Marcus講解劇情同排戲，又一齊練習走位，慈父感爆燈。

當大家一窩蜂搶奪食物時，Jay仍處之泰然

今次新歌連自己名字都出現喺歌名，令佢非常好奇：「歌名好特別，因為有我個名，係Wyman諗㗎！我都有問點解？可能佢寫呢首歌嘅時候都會諗，點解Jay Fung平時或者出嚟做嘢，畀別人印象情緒比較冷靜，或者對任何事都會好正面或者冷靜。」

新歌雖然以佢嘅好脾氣命名，不過Jay就自爆真實一面喇：「其實我都係有發脾氣嘅時候，但同其他人合作時，會希望保持大家都舒服嘅狀態，係一種尊重。無論對方任何行為，我自己嘅行為都要盡量做好嗰一面，唔好理人哋點樣做，做自己，展現尊重嘅態度。」