九龍城寨之圍城｜鄭保瑞出手剃光任賢齊頭髮 黃德斌憶童年入城寨探險時光

應屆金像獎最佳導演 鄭保瑞 嘔心瀝血嘅新作，改編自 余兒 原著小說，再加入 司徒劍僑 漫畫式動作意念，由 古天樂 林峯 劉俊謙 伍允龍 胡子彤 張文傑 任賢齊 黃德斌 廖子妤 朱栢康 及 蔡思韵  仲有新鮮熱辣金像獎終身成就獎 洪金寶 友情主演嘅《九龍城寨之圍城》5月1號就會正式上映。

新片除咗大量瘋狂動作場面之外，仲將80年代唔少人聞之色變嘅九龍城寨徹底還原，參演嘅 任賢齊 仲為演出灑脫剃光頭，而 黃德斌 則要扮演失明角色。小齊扮演叔父輩狄秋，仲係佢事隔廿多年再次為拍攝剃光頭，仲由毫無剪髮經驗嘅鄭保瑞親自操刀，小齊仲搞笑話：「等一下將古仔、林峯全都叫來吧﹗導演準備在九龍城寨裡開理髮廳了。」事後佢哋仲合照留念，鄭保瑞仲話：「當年《意外》，大家睇完覺佢好唔似小齊，今次想再嘗給大另一沒見嘅的小齊，既然佢演叔父輩，想佢髮線要高，造型有唔同，好多謝小齊為角色剃頭。」

小齊為新片決定剃頭，仲係由導演鄭保瑞親自落手

下定決心剃頭嘅小齊亦解釋話：「黐頭髮、化妝、卸妝加埋要5個幾鐘，真係難頂，化妝姐姐要提早3小時去現場又辛苦，所以決定剃頭等大家都輕鬆啲。雖然由導演幫我剃頭感覺好奇怪，不過佢答應如我下次我拍戲會幫我做監製，或者有其他事都會幫手，所以就應承俾導演親自出手。」

小齊直言剃頭後每日慳幾個鐘化妝時間，而導演仲話為報答乜都應承喎

小齊仲透露，當年首次為拍攝剃頭後，因為光頭接唔到任何演出，經歷大半年冇工作，當時仲處於未紅時期，連《心太軟》都未推出，佢話：「不過好享受過程，為工作同角色犧牲都覺得值得。」
 
除咗剃頭之外，小齊同導演談論劇本時，曾以為自己演出嘅大佬角色唔需要拍打戲，點知開工第一日已同林峯打到飛起，仲一打就打足兩星期，小齊話:「德斌同我一齊打林峯，林峯都打得好辛苦，我一腳將佢由二樓踢落一樓，其實好高，佢喺牆中間撞來撞去，差少少就爆缸。今次洪金寶大哥大依然親自出馬，一手一腳教我哋做動作，覺得敬佩令我更加落力去拍。」

小齊又提到以為新片中動作場面唔多，點知一開拍就狂打唔停

今次黃德斌嘅造型亦一樣特別，佢要扮演被打盲一隻眼嘅廟街大佬Tiger哥，德斌話：「Tiger哥係相當講義氣嘅江湖中人，今次學習虎鶴雙形拳都唔容易。」佢又指首日走入拍攝場景時覺得非常真實：「我曾住喺城寨附近，當年見到城寨都好想入去，行入一條巷都有啲驚。今次走入場景感覺像真度很高，成件事好有感覺。」

型爆嘅德斌同樣扮演大佬，仲令佢勾起年幼時對城寨嘅恐懼
雜亂又陰暗嘅佈景，的確重現當年嘅城寨味道