古淖文自爆經常蕩失路 譚輝智獲招待免費餐感尷尬

《中年好聲音2》三甲 古淖文 譚輝智 同 顏米羔自從比賽之後工作不斷，呢日佢地又受邀為一個慈善晚宴擔任表演嘉賓，因為節目大受歡迎，令參賽者人氣高企，唔單止出街有好多人認得，仲有啲意想不到嘅好事發生。古淖文就話自己對香港街道仲未熟悉，所以經常蕩失路，好彩有好多人會主動幫佢指路，甚至親自帶佢去目的地。

譚輝智就話試過有餐廳因為認出佢，而堅持請佢食飯，不過輝智就話覺得食免費餐非常唔好意思，叫大家唔好再請佢食飯啦！而顏米羔因為鍾意下廚所以經常行街市，試過菜檔檔主大聲招呼，仲比多幾條菜佢，搞到佢感謝之餘都有啲尷尬添！

同場仲有馬德鐘夫婦 郭柏妍 梁凱晴 謝東閔 陳庭欣 莊思敏等。好快就到Jacquelin生日，佢呼籲大家唔駛買禮物，將禮物錢捐比慈善機構更有意義。講到之前曾經提到同台灣前夫會離婚係因為三觀不合，Jacquelin就話有上次嘅經驗，體會到三觀契合真係好緊要，所以如果嚟緊再有新對象，一定會做自己，唔會再為迎合對方而扮嘢咁話喎！