言承旭現身時裝活動帥氣依舊 惠英紅計劃忙完工作去旅行

蘇州一個時裝活動，齊集大批名人紅星，包括 惠英紅 言承旭 李沁 米卡 劉憲華 余景天 等等，個個都悉心打扮，為活動生色唔少。當中最引人注目嘅一定係言承旭，佢呢日以all black造型亮相，長版西裝褸，令佢嘅身形更加修長，外貌keep得好好嘅Jerry，獲稱讚仍然好有少年感，完全睇唔出佢今年已經47歲。

紅姐呢日著住條黑色bling bling裙，低調得來又貴氣十足，仲不時揮手打招呼，紅姐話因為蘇州好靚，所以次次來到都覺得心情好好，紅姐預告今年陸續會有電影同電視劇嘅拍攝工作，最希望就係忙完所有工作，年尾可以有時間去旅行。

靚女李沁呢日以超短裙搭配同色西裝褸，大騷長腿，而近日佢喺新劇中都有新嘗試，就係挑戰飾演一個有雙面身份嘅角色，希望大家會鍾意。