太太涉毒後一度瘦剩29kg 阿沁為愛妻每日準備一日三餐

F.I.R.飛兒樂團前成員 阿沁  嘅網紅太太 花花 (李汶靜) 上個月因為持有大麻被捕，雖然最後大步攬過，而阿沁隨後亦自行驗尿，證明清白。呢日佢喺事件後首次出席公開活動，宣傳即將舉行嘅公益歌唱大賽，佢澄清自己並非刻意神隱，一直都有持續工作，工作亦都冇受到事件影響，太太喺事件發生後一直在家休養，不過好快都會復出為歌唱比賽擔任初選司儀。

阿沁話事件發生之後雖然好震驚，但從來冇怪責太太，反而擔心佢因為厭食症越來越瘦，佢透露太太一度瘦到得返29kg，仲輕過小學生，所以依家最重要嘅就係幫太太準備好一日三餐，希望佢可以盡快恢復健康。