香港婚後事｜女神收割機慘遭連環逼供 羅天宇「尷尬呆」萌度爆燈

劇集《婚後事》早前播出時掀起連番熱話，唔少網民對劇中探討嘅婚姻、愛情、家庭、不忠以及出軌問題都大有共鳴。有見及此，TVB緊貼劇集帶出嘅熱度同討論度，推出全新綜藝節目《香港婚後事》，由劇中四位主角 陳自瑤 賴慰玲 、黎諾懿 同 羅天宇 擔任主持，同大家繼續深入討論。

為令觀眾睇得更過癮同有新鮮感，四位主持將相約Glamping，以半talk show半真人騷形式帶出唔同嘅「愛情及婚姻」議題，小至婚前戀事、婚後夫妻意見不合、冷戰，大至精神及肉體出軌、離婚等等都全面真情分享。

《婚後事》幾位演員繼續喺新節目《香港婚後事》同嘉賓分享唔同婚姻問題

四位主持又邀請 羅子溢 連詩雅 張振朗 朱敏瀚 單立文 胡蓓蔚 吳若希 龔慈恩 姚子羚 同 李丞責等性格、年齡層同身份都各有不同嘅嘉賓參與討論，務求擴大討論時嘅角度同多元性。

Yoyo原來今次係首次露營，難怪咁開心喇

原來呢次係Yoyo同天宇「露營初體驗」，佢哋抵達拍攝現塊已表現得非常雀躍，四出探索唔同設家嘅Glamping房間，Yoyo仲童心大發大滾床單；至於Winki更搞笑，當佢見到全玻璃打造嘅房間時，即對私隱問題大表擔心，最後遭Yoyo「有窗簾架嘛」一句KO。之後當Winki睇到玻璃屋中嘅浴缸時，竟第一時間諗起諾懿兼笑作一團，未開始訪問已氣氛勁熾熱。

同樣首次露營嘅羅天宇仲會被大家圍攻

由於四位主持拍劇期間變得熟稔，四人無論閒談定訪談都「百無禁忌」、「一針見血」，天宇更慘淪「人肉箭靶」，無論主持抑或嘉賓都忍不住處處「啄住」天宇，其中諾懿更就「女神收割機」封號對天宇進行連串逼供，包括追問戲假情真次數，及同另一半glamping會否分床瞓等；而天宇每次都會怕醜到面紅兼口吃之餘，仲會出現萌爆「尷尬呆」，絕對係呢個節目重要「喜感擔當」。

幾位主持仲邀請咗唔同嘉賓一齊討論

問到諾懿點解對天宇咁殘忍，佢講笑話：「咁都係熟先至敢問得咁到肉，學子溢話齋，我哋平時拍劇都係咁樣窒嚟窒去，笑吓大家啲新聞咁，無論係真定假都好，我哋都會攞嚟玩，大家都唔會介意嘅。」對於成為「眾人玩具」，天宇就話：「其實都冇所謂，玩吓，我反而最在意係大家會唔會因為咁樣覺得我係冇努力工作嘅人。」眨眼已入行十五年嘅天宇，透露希望可以透過努力，令大家記得多啲佢嘅工作。

子溢亦會再次同Yoyo共聚

《香港婚後事》 4月25號起 逢星期四、五晚 22:30 翡翠台