楊千嬅自去年5月起舉行嘅巡迴演唱會，已經先後到內地同海外唔同城市舉行多場演出，而今次巡迴嘅全廣東歌2.0版本亦喺成都展開首場演出，全場坐滿3.6萬名歌迷，門票開售僅一個鐘頭就售韾。
成都站一開場，千嬅就以飛女姿態空降舞台，立即展開第一首歌《飛女正傳》嘅演出，全場大合唱之下，佢又接連獻唱多首經典歌，好似《烈女》、《繼續努力》 、《Wonder Women》；仲有《少女的祈禱》、《小城大事》 、《稀客》、《一個人的童話》等等。
千嬅唱完成20首歌先正式同台下觀眾打招呼傾偈，仲多次笑言要專心唱歌，因為一同大家傾計就會好易感動，點知到歌單最後一首《還有事情可慶祝》 ，都係被熱情歌迷大合唱之下忍唔住落淚。
到Encore部份，千嬅換上全新的造型出場，斜膊露肩藍色條紋裙，腳踏長靴連唱三首Medley。其後唱到《小星星》時全場觀眾都揮動手機。唱《再見二丁目》時 ，千嬅坐於台邊，千嬅再次落淚：「呢首歌係我人生中第一張唱片，哈哈，我有冇記錯？日子就是這樣子飄過，快要三十年啦，其實我依然係過得很快樂，回頭一看，所有的人生，所有的經歷，都非常值得。我可以再從頭選擇的話，我都係會做歌手。」
到最後一首歌曲《楊千嬅》 之後，由於成都觀眾太過熱情，佢破天荒二次Encore《假如讓我說下去》 ，整場共唱出33 首全廣東歌。
主辦單位於演出前亦非常重視，於成都雙子塔播出巨型LED廣告，千嬅一落機就到現場打卡，點知突然出現過百歌迷起哄，佢亦同大家大合照。成都歌迷創意亦層出不窮，於各個商場、演唱會外圍、後台等以不同方式應援，每一個都令千嬅愛不惜手。