姚焯菲首度現場跳唱新歌 親自教授舞蹈招牌手勢

姚焯菲 趁學期休息返港，為首支跳唱歌曲《Dreamscape》喺商場舉行新歌展覽，獲過百小菲象到場支持，Chantel更首度現場跳唱新歌一展舞技，輕鬆嘅舞步，完全配合到首歌「釋放壓力 盡情去玩」嘅感覺。

講起拍MV時，全程都有好多零食做道具，Chantel講起都眉飛色舞，仲話爆谷係開派對必備嘅食物之一，所以佢好開心見到MV整個氛圍，都充滿歡樂同夢幻。講起呢首歌嘅舞步，Chantel話自己好少跳得咁勁，佢更教大家幾下招牌手勢添。

而家忙於學業嘅Chantel，只會短暫留港兩星期，所以佢都有趁機同Felix林智樂仲有Sherman潘靜文食飯相聚，大家分享下近況，之不過，Chantel就話After Class各有各忙，所以都未能合體見面，只係早前去欣賞過Gigi炎明熹演唱會，叫做可以見一面咋。

至於講到考車牌一事，Chantel就話自己暫時未考到正式嘅駕駛執照，所以佢對自己嘅駕駛技術仲未太有信心，不過，佢話會努力練習，等真係考到車牌先敢載人遊車河呀。