電影泉攻略丨陳家樂自爆睇戲黑歷史 睇恐怖片被嚇到嘔丨EP99

王鎮泉 Jeoffrey  每星期為你提供最熱辣電影資訊，中外猛片專訪花絮上映時間全部集齊。「電影泉攻略」每周四買定爆谷陪你睇新戲。 

香港戲院商會4月21日舉行完「全港戲院日2024」，陳家樂 同 泉叔一齊為大家惡補一下關於戲劇嘅播放知識。

拍過唔少電影嘅陳家樂，就話自己鍾意睇嘅片種有好多，唯獨驚慄片就真係好少睇，因為佢曾經有過黑歷史，試過喺戲院睇恐怖片睇到嘔出嚟，所以自始之後就較少睇恐怖驚慄片喇！雖然有單咁爆嘅黑歷史，但家樂話自己睇恐怖片時都係會正面直視畫面，唔會遮遮掩掩。

唔少男士喺戲院睇催淚片時，都會忍耐唔喊出嚟，家樂就覺得喺戲院睇到感動位時全院一齊喊係一件重要嘅事，所以即使自己都會忍喊，但同時亦唔抗拒喺戲院落淚呀。家樂又指最令佢眼淺嘅電影，就係同運動題材有關嘅，當見到一班兄弟好熱血咁去打一場比賽時，佢就會忍唔住。


本周新片有：《無限制軍團》講二戰期間非常時期用非常手段，為求扭轉英國劣勢，英國首相邱吉爾號召各路狂人殺手，組成史上最喪秘密特種部隊奇招反擊。

《鐵人狗狗》講從未贏過嘅越野好手米高，拒絕讓運動生涯黯然落幕，決定率領三名隊友瞓身參與「最後一戰」，米高因餵過一隻流浪狗，豈料狗狗自此緊隨佢哋，一同攀過高山、越過森林、挑戰激流，甚至成為佢哋逃出險境嘅救星。

《第二十條》由張藝謀執導，講述人人喺法律面前，必須得到公平嘅故事，面對唔同案件，情與法較量。

《銀河寫手》講兩個懷着編劇夢嘅人，寫出自認為可以名垂青史嘅原創電影劇本，喺一群豬朋狗友幫助下，四處尋找資方與製片人撲水，試圖拍成電影搬上大銀幕。

《血滴姬》講述一班綁匪綁走黑道大佬個女阿姬，看守佢一晚就可以有豐厚報酬，點知呢個外表可愛天真嘅阿姫，查實係隻吸血怪物！