出租家人｜應邀參與芝加哥電影節放映 陳家樂獲璀璨之星大獎表揚

由劉偉恒執導，監製 曾志偉 同 恬妞 陳家樂 周家怡 等領銜主演嘅《出租家人》，參展第18季芝加哥亞洲躍動電影節(Asian Pop-up Cinema)，並喺閉幕夜獻映， 陳家樂 更獲頒璀璨之星(Bright Star Award)大獎，家樂同導演飛到當地出席，又同影迷近距離交流，家樂仲直言上台領獎時相當感觸

《出租家人》導演劉偉恒同陳家樂到芝加哥參與亞洲躍動電影節
 
獲頒璀璨之星大獎嘅家樂話：「好開心可以將一部講述香港故事嘅電影，帶到世界另一個地方，冇諗過遠在芝加哥嘅朋友都會鍾意，拍攝時冇諗到咁遙遠，但當影片嚟到芝加哥，我就會諗，不知佢哋明唔明白香港人嘅感覺？會不會同我哋有同樣感受？結果發現就算係香港故事、香港感情，都唔會有分別。」

家樂同導演亦參與咗映後分享，觀眾提問非常深入，不過家樂就話有少少遺憾喇：「需要透過翻譯，始終未能自己感受百分百傳達俾觀眾，希望下次可以用英文，令大家更加明白我嘅諗法。」

家樂更獲頒發璀璨之星大獎表揚，令佢非常感觸
 
而劉偉恒導演亦非常有同感：「不少外籍觀眾好有感受，譬如一位意大利朋友喊咗20分鐘，有啲美國土生土長華人亦好受觸動。因為電影表達亞洲家庭價值觀，可能西方未必咁了解，但原來都有共鳴，觀眾出乎意料咁熱情，映後問答環節做足半小時，大家好踴躍發問，足證外國觀眾依然好留意港產片！」
 
電影節表揚家樂近年嘅進步同卓越表現，家樂就直言非常感觸喇：「可能一早收到通知，唔係突然公布嗰種驚喜，不過上台領獎時，發現自己喺呢個行業已經一段時間，原來都有人睇到，而且唔止香港，世界各地唔同地方都有人認識陳家樂、有留意我嘅作品，對我係好大嘅鼓舞。」

佢同導演仲話冇估到外地觀眾都一樣被電影大為觸動

今次飛到芝加哥，除咗出席影展同領獎，家樂同劉導演仲指定一個地方必須要去，家樂話：「嚟到芝加哥，最重要梗係去NBA公牛嘅主場啦，細個好鍾意睇米高佐敦打籃球，我同導演去咗公牛主場參觀，總算一圓多年心願！」

難得到訪芝加哥，家樂仲特別到公牛主場拜訪參觀