梁思浩 向海嵐 江美儀 韋綺姍 同 安雅希 等應 向展鵬 嘅邀請，為一個音樂派對獻聲，原來視后美儀嘅歌喉都唔錯，佢仲講返以往不時同思浩喺內地酒吧騷登台，兩個人每晚都走幾場，然後就有默契咁夾前後場接力唱，思浩就讚美儀唱得好好，所以當時佢唱完之後就會話「如果想聽好歌就要聽江美儀，嚟梗下一場，而家呢一場就熱身場。」江美儀就喺旁邊失笑話「我就會喺另一個場話無比較無傷害，下一場唱嘅就係梁思浩。」
阿Anne為咗老友都登台獻唱，但佢都自認有啲緊張，佢話揀咗一首向展鵬參賽時，同佢練過嘅合唱歌，原來當時佢哋計劃若果向展鵬去到比賽後段，需要搵人合唱，佢就會幫手，雖然之前無機會唱，所以就揀呢個騷合唱。
作為搞手嘅向展鵬，就覺得無咗之前參賽時嘅壓力，而家唱得更加自如，佢就話因參加咗《中年好聲音2》，多咗同唱歌相關嘅邀約，例如舞台劇、拍戲、出唱片等，佢話舊年都唔會考慮，而家自己樣樣都會諗，襯自己仲係五十幾歲，因為到六十幾歲應該無咁多機會可以試。
