獨家探班丨黃嘉雯著婚紗拍瞓身動作戲 林凱恩晚裝高踭鞋泥地逃生

黃嘉雯同吳子冲呢日化身為郎才女貌嘅新人，為熱播劇《逆天奇案2》其中一個單元故事拍攝戶外婚禮戲份，原本一對新人喺台上宣誓畫面極之浪漫，點知突然遇到劫匪闖入會場，搞亂晒成個婚禮，著住婚紗禮服喺烈日下拍攝，但係Carmaney覺得最辛苦都係要應付動作場口，因為喺劇中佢會被匪徒挾持，面對生命危險，未拍過相關動作場面嘅佢都直認事前會驚同擔任做唔好，所以要聽足武指指導。

太太被人狹持，但係吳子冲就話自己呢幕戲只係左閃右避，搞到身旁嘅Carmaney即怪責佢話：「點解你唔救我？」吳子冲解釋劇情安排上係有嘗試救，但無奈啲保安太大隻，一句「少爺唔好呀！」就推走咗佢。

飾演富家女配戴名貴鑽飾嘅林凱恩，呢幕戲成為匪徒搶劫目標，唔好見佢著住晚裝兼高根鞋，跑起上嚟都見步如飛，Iris話原先喺草地行路時，個鞋踭成日插入泥中，但跑完之後佢就話低估自己，原來著高根鞋喺泥地跑都可以咁快，連追佢嘅匪徒都讚佢。佢話其實跑都唔係問題，但係著住高叉嘅裙嚟跑係要好有技巧，裙尾唔可以抽太高，因為會變成短裙，視覺上唔好睇，但又唔可以拎得太低，所以個技巧要掌握得好好，要保持譚道德個囡一向嘅風格。