梅媽100歲生日獲政府賀函致賀 生日會大仔梅啟明未見踪影

梅艶芳嘅媽媽梅覃美金今年3月10號渡過佢100歲生日，最近網上就流出親友為佢慶祝100歲生日嘅相同片，不過呢場生日會，就未見梅媽嘅大仔梅啟明出現。

片中所見一齊親友疑似係喺梅媽屋企為佢慶祝，佢哋喺電視枱上面放咗用汽球砌成嘅「100」，旁邊仲有梅艶芳嘅生活同活動照。眾親友為梅媽唱生日歌，而精神唔錯嘅梅媽就一齊拍手附和，當大家唱完生日歌後，梅媽就以國語表示：「謝謝，謝謝大家。」

除咗親友送上嘅利是外，梅媽仲收到勞工及福利局局長送出嘅賀函，梅媽仲將呢封賀函裱起嚟一齊合照添呀！