姚焯菲學整蔬菜花預祝母親節 呂慧儀爆阿仔用氹女仔方式錫媽咪

新西蘭留學嘅姚焯菲（Chantel）不時趁學校有假期就快閃回港會粉絲，雖然呢次Chantel只逗留兩星期，不過繼早前佢出席新歌展覽後，呢日又同呂慧儀現身商場活動自製蔬菜花慶祝下個月嘅母親節。

雖然Chantel喺母親節正日冇辦法陪媽咪一齊過，但佢期待到時同媽咪視像通話，Chantel仲話相信送畀媽咪嘅最好禮物，就係自己讀好啲書，而喺呢段時間佢都把握時間好好陪媽咪。

至於作為媽咪嘅呂慧儀就話自從有咗囝囝，自己會特別期待母親節，所以由囝囝細個開始就教佢氹女仔，因為自己好受落。
 
呢次係Chantel同呂慧儀首次一齊出活動，雖然Chantel身在異鄉，但佢一直心繫香港，喺放假嘅時候會追睇《愛·回家之開心速遞》，令呂慧儀聽到不知幾開心。呂慧儀都讚Chantel同一班《聲夢》畢業生能唱能跳仲識演戲做綜藝，真係非常優秀，希望未來喺《愛·回家》合作！不過被問會唔會培養囝囝音樂興趣時，呂慧儀就話囝囝偏向運動型發展！
 
此外，早前詹天文（Windy）宣布獲國外知名音樂學校取錄，作為After Class成員之一嘅Chantel得悉喜訊後都為Windy感到開心。