郭富城驚喜現身自揭隱藏角色 古天樂被蔡思韵摑到要敷冰

由鄭保瑞執導、古天樂、洪金寶、任賢齊、林峯、蔡思韵、劉俊謙等演出嘅大型動作港產電影舉行首映禮，一眾主演都有現身造勢，洪天明同太太周家蔚帶埋大仔洪大仁(TJ)同細仔洪竟稀(JT) 支持爸爸洪金寶。

活動期間仲揭開一個電影隱藏角色，就係郭富城(Aaron)特別演出，飾演古天樂嘅好友，Aaron現身首映禮時話無論有否參與演出都會嚟支持好友鄭保瑞，仲有電影中一班咁好嘅香港演員，並呼籲觀眾支持，為香港電影加油。而古生就話Aaron嘅演出係畀觀眾一個驚喜，並率先爆同Aaron有大量精彩對打戲。

蔡思韵喺台上不斷向古生道歉，因為喺戲中有場掌摑古生嘅戲份，蔡思韵真係出盡全力摑到對方面腫要敷冰，古生笑指：「第一巴已經進入休克狀態，之後嘅都冇咩反應，不過真係有個手掌印，塊面紅晒，耳仔有吓wee wee聲聽唔到嘢。」

大哥洪金寶獲兒子天明一家撐場固然開心，但佢更大心願係可以繼續拍多啲戲，話會努力搵老闆支持香港動作電影，不過其實佢最想拍嘅係愛情床上戲至真，但一直都乏人問津，仲笑問身邊嘅古生有冇得諗。

劉俊謙歸隊宣傳，令城寨四少終於齊章。戲中Aaron飾演林峯嘅爸爸，可惜兩人冇對手戲，四位當中林峯佔打戲最多，佢笑言四兄弟會喺片場互相按摩舒緩。