聲夢1+2｜最後一集嘉賓助陣激鬥 坤哥重現眼鏡起霧神場面

《聲夢》家族聯合參與嘅首個音樂綜藝《聲夢1+2》今晚播映最後一集，「終極擂台」仲集合星級外援嘉賓 吳業坤 張振朗，仲有《聲夢2》嘅導師 林奕匡 同 布志綸 助陣，展開四輪音樂比拼，加上 糖妹 會以「公證人」身份參與兼獻Sing。

今晚《聲夢》畢業生會分成兩隊以「擂台式」舞台終極對決， 紅隊 何晉樂 張馳豪 李茵彤 劉詠彤 林沚羿 ，對戰藍隊嘅 潘靜文 冼靖峰 侯雋熙 彭家賢 文凱婷 。披上拳擊戰袍逐一出場，似足參加真．拳賽，又一齊跳唱《太空漫遊》作opening，大晒青春活力！

《聲夢1＋2》今晚將播映最後一集，紅、藍兩隊再次大對決

「終極外援嘉賓」吳業坤、張振朗出場後，主持之一兼藍隊隊長Sherman大讚張振朗靚仔，Owen亦盡顯紳士風度讚Sherman靚女回禮，坤哥聞言即大細路上身「呷醋」話：「我出嚟嗰時唔話我靚仔嘅！」

呢集亦有坤哥、林亦匡、糖妹、布志綸同張振朗助陣

由於紅隊喺《聲夢1+2》已連贏4次，隊長Rock追問Owen有冇信心帶領藍隊從後居上，Owen即笑言：「如果輸咗嘅話幫你打爆坤哥副眼鏡。」而糖妹就自嘲係「史上最矮公證人」，比賽未開始已經笑料百出。

Alan為隊員參戰獻唱

呢集音樂比拼分為四大回合，其中「劇場版歌曲對戰」吳業坤同Desta獨白兼合唱歌曲《原來只因深愛著》，身穿迷你裙嘅Desta大騷青春本錢，而張振朗就同Sherman合唱劇集《靈戲逼人》主題曲《似夢迷離》；「和聲合唱終極戰」就由林奕匡獻唱首本名曲《高山低谷》，紅、藍隊分別派出Rock、Venus仲有Duncan、 Archie唱和音，Phil事後仲點名大讚Duncan表現。 

坤哥更因為緊張重現迷霧名場面

而遊戲環節同樣精彩又爆笑，本集繼續有經典遊戲「你吹我唱爆波波」，坤哥Owen邊唱《無賴》邊吹脹對方氣球，向來係靚聲之人嘅坤哥面對迅速膨脹嘅氣球嚇到走晒音，反而Owen表現淡定，不過兩人嘅護目鏡都起晒霧， 坤哥「神重現」昔日經典「眼鏡起霧」樣！

Sherman讚張振朗靚仔搞到坤哥呷醋

另一遊戲「倒轉估歌仔」，擁有「金魚記憶」嘅Archie未錄已要求重聽，Desta則無厘頭爆出一句「我都買到豉油」嘅 「歌詞」，發放連場笑彈！到底最終紅、藍邊隊勝出？記得留意今晚最後一集嘅《聲夢1+2》。

《聲夢1+2》最後一集，今晚 20:00 翡翠台