林憶蓮神穩四年終獻聲 孖好友倫永亮再站港樂舞台

神穩四年嘅 林憶蓮 終於踏紅館獻唱，Sandy呢次肯出山係因為應 香港管弦樂團 邀請為一連三日嘅「港樂50．友弦樂聚」音樂會助陣，好友 倫永亮 、兩位殿堂級歌后 陳潔靈 葉麗儀 、以及三位新生代歌手 馮允謙 涂毓麟 雲浩影 都有份演出。

Sandy喺好友兼最佳拍檔倫永亮嘅鋼琴伴奏下登台獻唱《早晨…》即時令全場充滿尖叫聲，跟住兩人再共同演繹《心田》、《依然》、《她比煙花寂寞》等作品，Sandy嘅歌聲依然超級有感染力，狀態大好。

呢次已經係繼2004年音樂會後，兩人再度同港樂合作，喺唱到歌曲《多謝》追憶已故摯友林振強時﹐現場播放兩人昔人港樂合作嘅畫面，更令Sandy相當感動哽咽。騷後Anthony有透露Sandy感觸嘅原因﹐話Sandy諗起20年前嘅回憶，令Anthony都唔知點樣招架，仲話佢哋都係好感性嘅人，眼淚都係預料之內。不過兩人老友鬼鬼，Anthony都有為4月26號生日嘅Sandy送祝福。

另外陳潔靈同葉麗儀（Frances） 為大家帶黎十多分鐘嘅「煇黃金曲」向兩位樂壇巨匠致敬，因為意義非凡連舞台經驗豐富嘅葉麗儀都話好緊張，練習咗好多次。去到環節尾段Frances都出現蝦碌狀況，唔小心鬆手跌咗手上嘅咪高峰。

而有份演出嘅馮允謙、涂毓麟同雲浩影各自都好興奮受邀與港樂合作，特別係讀古典樂出身嘅涂毓麟，更勾起佢嘅兒時回憶：「我年紀好細，大約六、七歲就同港樂合作過，加上今日可以喺舞台重遇演藝學院嘅師兄師姐，甚至係同學，係一件好開心嘅事。」

被問會否趁機去向難得現身嘅林憶蓮集郵時，馮允謙即時怕醜仔上身，話唔敢打擾前輩認真準備，而雲浩影喺綵排時欣賞到Sandy嘅歌聲令佢瞬間變成小迷妹。