姜麗文秘密舉行婚禮 秦沛飲女婿茶笑到見牙唔見眼

秦沛愛女 姜麗文 Lesley，29號喺社交平台貼出與圈外男友柏豪嘅結婚照，受疫情影響多年之後，早前已經註冊嘅佢哋終於正式設宴同家人共度呢個人生重要時刻。

據Lesley貼出嘅相中所見，佢同柏豪依傳統着上婚紗禮服向家中長輩斟茶，身為外父嘅秦沛更加係笑到見牙唔見眼，而感性嘅Lesley亦忍唔住落淚。

據知呢個婚禮喺3月時於香港舉行，而婚禮只有家人出席，當中包括哥哥姜文杰同太太、叔父姜大衞、李琳琳一家都有見證呢個幸福時刻。