福祿壽訓練學院｜復刻哥哥「鴛鴦舞王」 關嘉敏葉泓聲搞到「精神分裂」

喺《福祿壽訓練學院》 阮兆祥 王祖藍 同 李思捷 各自帶領學員展開團戰，要拎到最高總分全員先可以晉級，否則就會有學員被淘汰，星期日播出嘅第四集展開首回合之戰，各隊要派出學員復刻經典舞台，考學員嘅同時亦好考導師點樣布陣。

首回合Team Fuk祥師兄就自己出馬同趙頌宜出戰，重現莫文蔚喺經歌金曲頒獎禮演出《呼吸有害》嘅舞台。而Team Luk方面就遇到危機，祖藍本來編好嘅學員臨時話唔得閒錄影，到錄節目前一日又話有時間，搞到陣腳大亂，不過最終重現林子祥同曾比特《聲生不息》嘅舞台獲得最高分。

Team Sau方面李思捷就選擇派出關嘉敏同葉泓聲兩位跳得之人，復刻張國榮1984年《星光熠熠勁爭輝》「鴛鴦舞王」嘅演出，兩人要不停轉換性別跳唱，難度相當之高，結尾更有一段扭埋一齊轉圈嘅舞步，比當年嘅版本難度升級。雖然演出並唔係最高分，但係都獲評判羅冠蘭大讚，仲特別點名讚葉泓聲演得比關嘉敏嫵媚。兩人亦分享演出背後嘅難度，關嘉敏用精神分裂黎形容演出:「每隔幾秒就變一次性別真係好大挑戰。」葉泓聲覺得兩個人交替變性別，比一個人更有難度:「特別係轉來轉去嗰段，綵排時成日搞亂，唔知自己要扮男定女，有時長期都擺住蘭花手。」