高山低谷十周年開音樂會紀念 林奕匡台上感激遇上懷孕老婆

林奕匡 為紀念代表作《高山低谷》推出10周年，上個週末於舉行兩場「高山低谷10週年Special - Phil Lam The Great Decade Live」音樂會，以最鍾愛嘅音樂同大家重溫過去10年美好時光，好友 陳柏宇 布志綸 小塵埃 區子琳 力臻 KING@C AllStar等都到場欣賞，Phil嘅孕妻 李靄璣 當然亦現身為老公打氣。

林奕匡紀念《高山低谷》推出10周年舉辦音樂會

Phil一出場就以露出胸肌嘅紅色西裝，悠閒於化妝枱上，邊吹奏色士風邊獻唱音樂會主題歌《高山低谷》開場。然後再演唱改編得充滿玩味感嘅《孤獨的對岸》。之後Phil同大家打完招呼再話：「《高山低谷》啱啱好推出十年，唔通真係唱足成晚咩，其實更重要係呢十年經歷嘅嘢。」又分享自己曾經以成為爵士歌手為目標，可惜世事未如人意，又笑謂偶爾於台上吹奏色士風已非常滿足。

曾理想成為爵士歌手嘅Phil，呢晚獲大班好友入場支持

之後Phil唱出《時間的囚犯》同《榮辱戰爭》，再到鋼琴前自彈自唱《安徒生的錯》。自言理智嘅佢，選擇做歌手可能係人生最唔理智嘅決定：「但係係最啱嘅決定。好多謝我嘅屋企人，我要多謝埋我太太，無論幾時都冇放棄我，遇到《高山低谷》係好難得嘅緣分，遇到你都係好難嘅事，我知道我未來要造更多好歌畀你哋。」之後送上充滿暖意嘅《頌讚詩》、《一世同學》同親自彈奏木結他部份嘅《有淚多好》。

呢晚同一班嘉賓共聚嘅阿Phil，仲指會繼續為未來發展而努力

Phil呢晚邀請兩位同門 黃妍 同 葉巧琳 參與演出，又齊齊獻唱於THE FIRST TAKE合唱嘅《藝術與科學》，老友鬼鬼嘅佢哋分享趣事，Phil自爆經常要為兩女做攝影師影相，Misch則大讚Phil娶到又靚又好嘅太太有眼光。Cath之後再同Mischa合唱由Phil作曲嘅《一表人才》。

換上橙黑色造型再次登場嘅Phil，同Micheal C 於台上以樂器battle，各自演奏色士風同電結他。

阿Phil仲特別多謝太太一直以來為自己帶來無窮支持

之後佢又指外界經常認為他是好人：「我覺得自己唔算好人，好人應該再好我好多。不過人愈大覺得唔可以乜都得，都就嚟做爸爸啦，有啲嘢都要硬淨啲，相信啱嘅事就去做。」獻唱完幾首情歌之後，Phil再為歌迷送上驚喜，現場首唱未正式推出嘅新歌《波希米亞 (沒有) 狂想曲》同《有人共鳴》，佢話：「就算只係淨低一個人與我共鳴，都足夠陪我走過高山低谷。緊接再唱出特別編製嘅十週年版《高山低谷》。

到音樂會尾聲，Phil獻唱《愛情小品》時到台下與樂迷握手，最後唱出《一雙手》又同樂迷影大合照。尾場樂迷更不肯離場瘋狂叫Encore，最終Phil再次驚喜出台，自彈自唱歌單中未有嘅《第一個早晨》，最後同樂迷大合唱《安徒生的錯》結束演唱會。