怪宿宿｜葉靖儀比堅尼出海曬身材 伍韻婷日本返校變小學雞

由 黃紫恩 馮子亮 陳國麟 伍韻婷 葉靖儀 蔡景行 同 陳玟蒽 主持嘅旅遊節目《怪宿宿》，帶觀眾走訪馬來西亞、日本、荷蘭、比利時等地，尋找與眾不同嘅另類住宿。包括有用貨櫃箱、吊船、鑽油台改裝成嘅酒店，亦有以獨特外型作招徠，仿照蘑菇、積木甚至人類大腸建成嘅度假屋，遠遠超出大家想像。

星期一晚嘅節目Michelle同行仔去到泰國芭堤雅，挑戰瞓漁船同瞓遊艇嘅不同風味，二人率先體驗做個有錢人，豪華遊艇內設備應有盡有，Michelle坐喺卧房軟硬適中嘅大床上，顯得非常寫意，並笑言︰「當年選港姐嘅感覺返晒嚟。」

Michelle同行仔到泰國，試住有趣嘅船屋

之後佢哋又準備暢玩水上活動，自稱係「將軍澳美人魚」嘅Michelle換上一套全白色三點式泳衣派福利，佢試玩直立板時，雖然表現驚青，但都挑戰成功。行仔就運動細胞一般，花咗一段時間先勉強企直，轉個頭就失平衡跌落水。接住他們轉到漁船體驗漁民生活，簡樸而略帶粗糙嘅布置，別有一番風味。

自稱將軍澳美人魚嘅佢又挑戰直立板

至於今晚Jojo同Jacy再度登場，一齊介紹位於馬來西亞嘅飛機酒店。酒店由波音貨機改裝而成，麻雀雖小但卡拉OK、按摩椅等娛樂設施都有，而且設計新穎。

今晚Jojo同Jacy就會入住飛機改裝而成嘅酒店

而星期四晚Doniven同伍韻婷會喺日本淡路島體驗返校滋味，介紹一所由學校改建而成嘅酒店，二人笑言重拾做「小學雞」嘅回憶。學校禮堂有一座彈床，二人童心未泯，Juliana跳得太盡興高呼跳到瀨尿。兩人喺酒店認識咗酒店店長席定京吾，並幫忙燒木提供暖氣，可惜雞手鴨腳嘅Doniven就越幫越忙。

而星期四一集Doniven同伍韻婷就會入住日本一間前小學改建嘅「怪宿宿」喇


《怪宿宿》逢星期一、二、四、五晚 20:30 TVB Plus(82台)