順嫂梁葆貞大談婆媳關係 分享與張國榮周潤發回憶

已經退出幕前隨女兒移民去加拿大享清福嘅「順嫂」梁葆貞，早前回港探親時接受電台節目訪問，大談而家嘅退休生活，同埋以前同張國榮、周潤發嘅相處點滴。

87歲嘅順嫂現時有孫有曾孫，四代同堂相當幸福愜意，而且每年都會返香港探望兒媳，順嫂話：「我就好似隻候鳥咁，我鍾意加拿大嘅夏天，冇咁炎熱；我鍾意香港嘅冬天，唔會成日落雨，唔會成日黑麻麻，一早就天黑，咁兩邊都有我摯親嘅人，咁我咪變咗兩面飛囉！」
「順嫂」梁葆貞早前接受電台節目訪問。
講到同新抱仔嘅關係，順嫂多次大讚喺香港居住嘅媳婦，話對方唔住孝順，講嘢仲相當溫柔，令佢呢位奶奶甜在心頭，所以先會每年都返香港探親，順嫂話：「新抱同你根本係冇血緣關係，佢唔嫁你個仔都唔識你，咁佢嫁你個仔識到你，婆媳關係都係一種學問，最焦點就係尊重！」順嫂話而家高高在上嘅「家婆」呢套已經行唔通，佢覺得做人要將心比心，之後又大讚新抱仔對自己非常好，事事都尊重佢哋，所以佢不諱言自己錫新抱仔嘅程度比親生仔女更甚。
順嫂大讚新抱仔。
入行逾40年嘅順嫂，父親係已故粵劇界一代始祖、演藝界名宿梁醒波，佢坦言喺娛樂圈見盡人生百態，不過好知足嘅佢樂做一個小人物角色。順嫂指自己最欣賞嘅兩位巨星級偶像係「哥哥」張國榮同埋「發哥」周潤發，

佢憶述有次返電視台拍劇巧遇張國榮，當對方知道自己同樣移民到溫哥華，當時哥哥就問順嫂點解唔搵佢飲茶：「我話哥哥我冇你個電話呀，佢話我而家寫畀你，但(有人)叫佢入廠，結果佢拎住個地址、電話逐個廠搵我，佢唔知我喺邊個廠拍嘢！我都好感動，哥哥真係對老人家好尊重、好尊重的一個紅嘅明星！」
梁葆貞與馬浚偉。
至於發哥，順嫂就同大家分享佢同對方喺台慶後台嘅對話，順嫂話：「佢問我點解瘦咗咁多，我話我有糖尿病，佢話『睇醫生，我聽日同你睇醫生』，我話唔使我已經睇緊醫生食緊藥，我好感動！」

另外，喺訪問期間馬浚偉亦嚟到探班，順嫂諗起當年同對方拍劇時，馬仔對老人家相當關懷。