胡定欣同蔡潔等早前去到澳門出席《第四屆新時代國際電視節》擔任頒獎嘉賓。以一襲棗紅色大露背貼身裙亮相嘅定欣，大騷白滑玉背盡顯fit爆身形，而蔡潔則以一身祼色透視長裙出席。
將會喺書展再度出書嘅蔡潔，透露呢次將會推出第一本漫畫作品，並會以禁忌之戀為題材，講到漫畫籌備情況，蔡潔透露籌備得如火如荼：「其實自己之前一路無諗過要推出漫畫，但上年年尾『叮』一聲！漫畫可以好天馬行空，好新鮮。我一諗到就即刻好俾心機去做！」
以禁忌之戀為題材，帶出殘酷青春故事，蔡潔話自己都好期待完成作品，畀書迷驚喜。除咗幕前演出外，蔡潔透露自己亦有編寫劇本，希望將來可以拍成電影。
同場嘅定欣，過去四年嚟一直進修歌藝，佢話希望可以進軍歌壇，擁有屬於自己嘅歌，將來可以以歌手身份示人。
