逆天奇案2丨方力申對林夏薇生情愫 陷害陳展鵬捲盜竊風波

TVB熱播劇《逆天奇案2》噚晚（2日）呢集講森Sir （陳展鵬飾）捲入盜竊風波。 劇情講到森 Sir及阿Wing（林夏薇飾）喺街上遇到搶劫案，一名外籍老婦被人持刀行劫，老婦腹部中刀，放喺手袋嘅美金灑落一地，劫匪則落荒而逃。

展鵬同薇薇熱心幫助一個老婆婆。點知展鵬亦因此捲入盜竊風波。

森Sir、阿Wing幫老婦執滿地美金後，隨即送老婦去醫院。本來只係熱心助人，豈料卻令森Sir 陷入盜竊風波，重案組探員喺森Sir嘅汽車搜證，竟然發現老婦消失1萬8千元美金，森Sir旋即成為疑犯。原來所有事情都係冠峰（方力申飾）喺背後搞鬼，除咗暗中安排盜竊案，仲利用媒體炒作事件帶風向，律政司最終以盜竊罪起訴森Sir。冠峰陷害森Sir嘅主因係同阿Wing有關。一向理性大於感性嘅冠峰經過與阿Wing多番相處後，被阿Wing善良、不可預測所吸引，對阿 Wing漸生情愫，故當冠峰發現阿Wing對森Sir餘情未了，即時妒火中燒設局陷害森Sir。

展鵬被懷疑偷咗老婆婆 1.8 萬美金。
方力申被林夏薇「不可預測」吸引生情愫，妒火中燒陷害陳展鵬捲盜竊風波。

噚晚呢集尾聲有久違香港娛樂圈三十多年嘅劉緯民驚喜登場！緯民哥喺劇中飾演展鵬爸爸，今次難得回港客串拍劇，相隔多年再拍劇，佢坦言感覺大不同：「覺得自己好似一個新人咁，以前我哋一個studio就拍晒成場戲，講錯一句對白就要成場嚟過，依家就輕鬆咗啲。」現年73歲嘅劉緯民拍過唔少膾炙人口嘅作品，並喺1985年當紅嗰陣選擇急流勇退移民加拿大，後嚟創立珠寶公司，更被封為「珠寶大亨」。

原來係小方背後搞鬼，小方對薇薇漸生情愫。小方見到薇薇對展鵬餘情未了，妒火中燒！

對於能夠與緯民哥結父子緣，展鵬受訪時直言好開心：「大家都喺亞視做過，細細個都有睇過佢劇集，但當時太細個印象唔係好深刻。雖然佢已經73歲，但係佢真係Keep得非常之好，狀態好好，自己拍劇都好耐冇一個爸爸。可以同佢一 齊合作係一個好好嘅回憶，希望大家鍾意我哋呢段父子情啦！」

劉緯民驚喜客串展鵬爸爸，展鵬話好開心可以同緯民哥合作。

《逆天奇案 2》逢周一至五晚八點半翡翠台播映