由邱禮濤執導，謝霆鋒擔任動作指導兼主演，齊集張學友、林嘉欣等卡司嘅《海關戰線》，獲邀成為第26屆意大利烏甸尼遠東電影節閉幕電影，同時亦入圍競賽單元，為隆重其事，導演邱禮濤、編劇李敏聯同主角謝霆鋒親赴意大利烏甸尼出席影展，同時舉行世界首映禮，同現場觀眾作近距離接觸。
大批影迷喺首映禮舉行前，已經提前到現場霸位，三位主創一現身，隨即引爆一片哄動，影迷爭相索取簽名，霆鋒亦有求必應，盡量滿足大家。三位主創更上台分享感受，霆鋒表示好榮幸電影可以喺烏甸尼舉行全球首映，希望大家可以真實感受呢部電影，並且會鍾意。而電影播畢現場亦都響起如雷嘅掌聲同歡呼聲。
對於《海關戰線》未上畫已得到國際性影展垂青，霆鋒坦言大感鼓舞：「當然開心，我好希望將華語電影同世界接軌，今次係一個好好嘅平台同機會！」 霆鋒笑言今次旅程非常難忘：「由上海出發到烏甸尼，差唔多需要二十個鐘，要先用九個半鐘，由上海飛杜拜，杜拜停三個幾鐘後，再用六個半鐘飛去威尼斯，再由威尼斯轉機個半鐘到烏甸尼，然後直接開工，現在都有點暈眩感覺！」
而適逢終身成就金桑獎（Golden Mulberry Award）頒獎禮喺首映禮前隆重舉行，國際殿堂級大導演張藝謀親身接受榮譽，霆鋒等人亦有特別出席盛會，向張藝謀導演致最崇高敬意，霆鋒仲同張導演寒暄合照，期待未來有合作機會。
