郭晉安歐倩怡婚變有跡可尋 曾親揭夫妻狀況陷瀕危邊緣

郭晉安同歐倩怡結婚18年，育有一對子女，一直被外界視為圈中模範夫妻，二人於5月2號喺社交網發文宣布離婚，令不少人大感詫異同深感惋惜，二人透露兩年前已分開生活，為彼此付出過、為家人努力過，更傳安仔持有多個物業市值9000萬，而老婆仔女並冇持有，希望將來離開人世要貢獻社會。

郭晉安同歐倩怡當年拍旅遊節目結緣，無懼相差15載嘅年齡障礙，郭晉安於2008年受訪講過冇諗過自己識一個細咁多嘅女仔，相信呢一切係緣分，佢哋婚後不時夫妻檔現身放閃，後來歐倩怡成為全職媽媽，專心相夫教子，佢亦有自我增值進修，生活圈子與以往有差異，歐倩怡去年正式執業成為營養師。

歐倩怡於2018年曾公開談及夫妻狀況踏入瀕危邊緣，直至2021年，郭晉安亦親揭婚變危機，早喺2016年拍劇集《致命復活》太投入角色，令佢一度陷入嚴重抑鬱，夫妻接近零溝通長達半年，幸好二人努力修補關係，佢哋喺4年前曾甜蜜現身節目《流行經典50年》對唱。