芷珊約您丨直擊草蜢高雄巨蛋演唱會三兄弟緣份始於童年

由黎芷珊主持《芷珊約您》逢星期日晚上9點半翡翠台播映，明晚（5日）播出第三集嘉賓係組合草蜢，芷珊飛去台灣綵排現場探班兼直擊高雄巨蛋演唱會，草蜢更係首個喺高雄巨蛋開騷嘅香港組合，草蜢三子蔡一智、蔡一傑及蘇志威成軍39年，相隔30年再赴高雄開騷，三子全力投入綵排及公演，務求展現出對舞台嘅專業及執着。

今集嘉賓係草蜢。

傑仔大爆籌備演唱會期間會瘋狂做運動保持最佳狀態，開騷前20小時，綵排氣氛突然變得緊張，三子直言有衝突，但絕無隔夜仇，阿智笑言：「對於我哋嚟講係『開會』，對人哋嚟講就係鬧交，我哋開會係用好進取方法，快、靚、正，咪就係直接講！」正式開騷30分鐘前，芷珊突擊三子準備情況，阿智開騷前會拉筋做熱身，阿細會閉目模擬開騷情況，傑仔就會刷牙，傑仔笑言：「呢個係羅文教我嘅，刷牙時係按摩咗啲牙肉，出嚟聲音係會圓潤啲。」

草蜢對綵排好認真。

三子喺正式開騷使盡渾身解數又唱又跳，歌迷High爆由頭跳到落尾，氣氛熾熱。去到尾聲時，有不少粉絲不捨落淚，草蜢三子亦感動得差啲唱唔到落去。芷珊分別與草蜢三子進行深情專訪，三子緣份從童年開始，原來佢哋係隔籬鄰舍，雖然草蜢出道多年，但一智笑言有唔少人會撈亂佢哋，就連證婚律師曾搞錯，講錯新郎名稱係「蔡一傑」，草蜢三兄弟無分彼此，就連歌酬都存入共同帳戶，由數口精嘅蘇老闆負責管數，蘇老闆笑言：「佢哋兩個唔知有幾錢，只係得我知有幾錢，由入行到依家都係，用咗去邊會寫低晒，因為我哋三兄弟，唔想話你欠我、我欠你咁，用一本簿寫住晒，依家啲簿仲喺度。」講到3人邊個企C位嘅問題，蘇老闆直言唔恨企C位，皆因企C位壓力大，更大爆傑仔經常企C位嘅原因！

阿智開騷前會拉筋。蘇老闆閉目模擬開騷情況。阿傑就話開騷前會刷牙。草蜢喺台灣好多粉絲。草蜢又唱又跳，全場 High 爆。有歌迷不捨爆喊，草蜢都話好感動。阿傑為開騷 Chur 到盡。阿智話到依家都有人認錯佢做阿傑，就連結婚都唔例外！蘇老闆係草蜢嘅管數人。草蜢經理人林珊珊都會接受訪問。