五月天香港巡唱第二場順利開騷 五迷力撐偶像為安全改期

台灣天團 五月天 7場演唱會雖然一開鑼就遇上黃雨來襲以及球型LED屏幕起火，引致原定5月1號場次延期至9號舉行。不過好彩經歷完水火夾攻過後，原定5月3號一場順利展開，五子亦喺台上向因延期而受影響嘅觀眾表示歉意。

雖然陰晴不定嘅天氣令演唱會好事多磨，之但係仍然無阻五迷投入睇騷嘅熱情，而五月天更邀請近期合體重組嘅男團ENERGY擔任表演嘉賓，更同ENERGY一齊大展舞技，大跳ENERGY新歌《星期五晚上》，令全場尖叫。

主唱阿信一向主意多多，本身想叫ENERGY成員牛奶教跳舞嘅佢，就被牛奶反將一軍，提議要五月天跟住ENERGY跳極需要良好體能嘅「E16蹲」，嚇到五子立刻耍手擰頭，阿信仲問可唔可以五個人輪流跳夠十六下，場面搞笑。但最後五子都有乖乖跟ENERGY跳「E16蹲」，而吉他手石頭仲係唯一一個堅持到最後嘅人啊。

雖然五月天呢次來港開騷遇雨神、雷神作弄，但愛錫佢地嘅五迷都唔介意偶像為顧及大家安全而改期開騷，亦有五迷精心製作應該小物嘅同其他同好交換，而佢地亦齊齊透過我哋嘅鏡頭向五月天打氣，表示永遠會支持佢地，非常暖心！