早D知早D醫丨中聲梁德欣徘徊生死邊緣 堅持懷孕生育學會珍惜生命

健康資訊節目《早D知早D醫》6號晚播出第七集，節目邀請咗第一季《中年好聲音》參賽者梁德欣（Mimi），分享患上系統性紅斑狼瘡嘅「長命戰」心路歷程。

《早D知早D醫》

Mimi喺2009年確診紅斑狼瘡，病發初期時常出現偏頭痛、容易疲倦、長期低燒等病徵，接受一連串身體檢查後，醫生斷定佢患上末期淋巴癌，曾一度住進ICU病房；幾乎見盡成間醫院嘅專科醫生，最終由風濕科醫生確診為紅斑狼瘡：「正常人Check指數係零，但我嘅指數係600幾，醫生即刻用大量類固醇救番我條命，嗰時我覺得生命有危險！」患病者不但出現皮膚問題，全身器官隨時被襲擊，而Mimi的關節正正受影響，曾經有段時間行唔到路，要靠拐杖輔助行路。服藥一年嘅佢已出現骨質疏鬆等副作用，醫生亦指Mimi患癌、糖尿病風險比一般人高七成。 

今集請嚟《中年好聲音》參賽者梁德欣，分享患上系統性紅斑狼瘡嘅心路歷程。當年Mimi因為紅斑狼瘡住院。

Mimi並無自暴自棄，反而樂觀面對，即使醫生們勸喻佢唔好生小孩，免得身體帶嚟不必要負荷，但係佢卻選擇喺患病時誕下女兒，幸好母女平安，女兒已經約12歲。曾歷死亡邊緣嘅Mimi學會珍惜，辭去高薪厚職嘅銀行工，將時間陪伴家人，見證女兒成長：「曾經覺得生命有危險，學識咗生命真係好短暫，如果唔做自己想做嘅嘢、愛你自己想愛嘅人，人生會有遺憾。」Mimi欣然接受同疾病共存，唔會擔心病情惡化而避開太陽，佢話：「唯有生活上互相就下，去旅行盡量唔喺最曬嘅時間出沒。」Mimi仲希望將及時行樂嘅精神鼓勵同路人，歡迎大家IG私訊佢：「如果有人需要或好想知道如何令心境好啲，歡迎IG搵我，願意分享點樣同呢個病共存。」
今集仲有濕疹患者上嚟分享。
此外，本集仲有素人阿Yan分享嚴重濕疹病況，多年飽受濕疹困擾，搽類固醇已達「滑啞」階段。近月獲資助下注射價錢近9千元一支嘅生物製劑，經過4個月注射後，病情已穩定，阿Yan終於可以回復一直未能參與嘅戶外活動！

《早D知早D醫》逢星期一至三 22:30 翡翠台