JACE陳凱詠蛇妖上身 鬧鬼廢棄酒店取景拍MV

回歸獨立歌手嘅JACE 陳凱詠以經典民間傳說《白蛇傳》作靈感，創作今年新歌《百妖夜行的修行》，充滿玩味嘅跳唱曲式，用現代嘅視角詮釋「百妖」概念，係妖係怪唔由得旁人指指點點，鼓勵每個人儘管擁抱最真實嘅自己，JACE 話：「《白蛇傳》咁經典，我當然知係咩啦，我覺得白蛇同青蛇都好勇敢，妖精都可以去愛㗎，雖然我哋唔係千年修行嘅妖，但係都可以做返自己。怪就怪，怪得嚟唔傷害人，怪得嚟自己開心就夠，其他人嘅眼光？Let go啦。」

Jace嘅新歌以傳民間傳說作為靈感，妖氣十足

早前同團隊為MV遠赴台灣取景，可惜拍攝期間遇上台灣地震，幸好未受到影響亦未有於過程中遇到餘震。JACE直言好感恩：「台灣真係一個好正嘅地方，希望大家都平平安安。」呢次MV拍攝地點係位於桃園市嘅廢棄酒店，環境惡劣之餘，亦有唔少鬧鬼傳聞，JACE指拍攝時有舞者稱「有人拍佢」，加上佢啱啱病癒又要拍攝濕身場口，令JACE大感不適。雖然面對惡劣拍攝環境兼疑似鬧鬼，JACE仍堅持拍攝。

喺台灣一間廢棄酒店拍攝嘅佢哋，期間仲遇上地震

JACE喺MV中同舞蹈員鬥騷鬥妖，狂扭纖腰次餘，亦不乏貼身舞步，更有一幕360度轉身仰卧抬腿嘅高難度動作，雖然佢穿上5吋高跟鞋，仍然毫不錫身，正式拍攝前更多次反複練習，為求順利完成：「我覺得好好玩同好有型，雖然對鞋好高，但係咁先正！同埋早兩日喺IG分享咗張『蛇咬』相，好多朋友即刻留言關心我，同大家講聲唔好意思，冇計啦，而家造歌真係要做好多嘢㗎，嘻。」貫徹JACE的好玩破格性格，以「新歌」向粉絲報平安。

早前於社交平台貼出傷痕相嘅佢，其實係為新歌宣傳