何守信返港為《開心日報》最後一集開咪 分享當年直播搞笑辛酸史

港台節目《開心日報》開播近22年，日前終於光榮完成呢個歷史任務，喺最後一集多位歷代主持均有現身一齊開咪，當中包括由加拿大返港嘅何守信。
何守信返港為《開心日報》最後一集坐鎮。
2011年起就為呢個節目擔任主持嘅何守信，喺2018年退休並移民到加拿大生活，今次佢返嚟坐鎮節目嘅最後一集，令唔少聽眾都相當興奮。節目入面，杜雯惠講起當年何守信教識佢哋唔少做直播嘅技巧，好似點樣喺節目入面口述龍舟賽事，何守信笑言自己唔太鍾意娛樂gossip嘢，但係講龍舟賽事呢啲佢就完全無問題，因為都係將自己嘅經歷講返出嚟。
何守信喺節目中分享當年做直播嘅經歷。
何守信又分享當年自己一個人做花車巡遊嘅經歷，佢笑言由於得自己一個主持，唔只連去廁所嘅時間都冇，仲畀上頭落命令，叫佢隔離台唔收工佢哋都要繼續做落去，聽完就知有幾辛苦啦！而喺節目尾聲，歷代主持逐一分享呢個節目對自己嘅感受同影響。
蘭子早一日last day咗。
同樣係《開心日報》主持嘅陳淑蘭，就比節目早一日Last Day，佢喺社交平台貼出last day嘅相，並留言表示：「📻成為「開心日報」主持人，原來不經不覺從2013年4月20日到2024年5月3日止，已經做了11年了📆天下無不散之筵席🥹感恩我的人生中能有幸做到一個這麽好的電台節目📻亦因為這節目我身邊多了像朋友一樣的聽衆，送給我很多快樂的回憶！多謝你妳李⋯請再繼續支持我的「她他它」❤️🥰」
蘭子早一日已經last day咗。