方健儀圓飛機師夢成Captain Fong 揸小型飛機載爸爸翱翔天際

方健儀Akina近年一有時間就會同家人朋友去旅行享受人生，早前Akina就去咗塞班島旅行兼學揸飛機，佢仲將成個過程拍低擺咗上社交平台，仲話大家以後可以叫佢做Captain Fong呀！

Akina喺帖文入面話自己中學時代除咗想做記者之外，就係想做飛機師，原因係飛機師可以無拘無束咁翱翔天際，但可惜當年佢因為有近視，所以先做唔成。不過估唔到呢個飛機師夢，喺30幾年後竟然可以圓夢，Akina表示：「估唔到我30幾年後，喺塞班島圓夢，揸小型飛機，當然有真正機師傍住啦（BTW機師好靚仔）。最初以為好似揸車咁易，點知個軚盤好鬼敏感，大力少少拉佢，架機立即上升，轉左轉右都要輕輕力，輕輕力，好彩同機嘅老爸方生見慣大場面，唔怕唔怕唔怕嘅🤪🤪🤪。」

片中所見，坐後排嘅方爸爸相當興奮，拎住電話影低乖女揸飛機嘅花絮，而喺前排嘅Akina，就喺靚仔飛機師嘅教導下開始駕駛飛機。佢哋喺天上飛咗大約20分鐘後先返落地面，當Akina問到方爸爸自己揸飛機載佢飛上天時有冇驚？方爸爸就信心十足咁話：「一啲都冇驚呀！」相當可愛。

而今次塞班島圓夢之旅，除咗Akina成為Captain Fong外，佢兩位姊妹都成功拎到證書，Akina話：「三姊妹輪流飛上天揸飛機20分鐘，載住兩老漫遊塞班。著陸後大家都有張證書，方氏仝人成就解鎖🔓🔓🔓」