ENERGY拋下成見合體復出 承認隊友間曾不和失聯

台灣男子組合ENERGY合體復出後，頻頻有新搞作，除咗推出新歌，佢哋仲要踏上小巨蛋開騷，兩場演唱會門票火速售罄。ENERGY五子預告演唱會有彩蛋，但係佢哋開會時只係討論歌單，實質仲有好多事仲未知道，不過佢哋話從佢哋揀選嘅歌單，再加上粉絲嘅願望清單，已經係超出演唱會時間，佢哋唯有喺各人體力範圍內盡力跳唱完成演出。

ENERGY自從2002年出道後，成績相當唔錯，但係經歷成員退團、重組同埋再加入新成員之後，人氣不如以往，最後宣告解散，有傳係因為團員之間不和，呢日佢哋都大方承認確有其事，解散後仲失聯咗一段時間，而家已經和好，佢哋仲將昔日不如拎嚟開玩笑。

團員中，牛奶同阿弟已經榮升為爸爸，佢哋都好開心有機會，畀小朋友見到自己喺台上跳唱嘅一面，尤其阿弟仲話自從團隊重組後，自己喺屋企地方都提升唔少，因為喺五月天高雄站擔任嘉賓，當晚太太同囡囡都有捧場，喺返酒店時，從來未要求過同佢自拍嘅囡囡，竟然拎出手機要求同佢自拍，仲讚佢好靚仔。