胡楓如願於澳門舉行演唱會 獲林子祥夫婦送插畫祝賀

修哥胡楓嚟緊將會喺澳門舉行演唱會，適逢陳太陳淑芬正喺澳門舉行紀念展，所以陳太藉此邀約修哥喺呢個紀念展中舉行個唱分享會。
陳太邀請修哥嚟舉行個唱分享會。
修哥喺分享會上話自己8、9歲時，成日會趁放假嚟澳門渡假，佢話呢度帶畀自己好多兒時愉快回憶同親切感，能夠喺呢度開騷都係佢嘅心願。今次澳門個唱嘉賓名單有24位嘉賓會嚟支持修哥參予演出，當中包括張家輝、王祖藍、阮兆祥、李思捷、羅蘭 、肥媽、Joe Junior、顧紀筠、 鄭丹瑞、斑斑、蘇永康、黎瑞恩、胡杏兒、何國材、鄧麗欣、周柏豪、王菀之、張繼聰、許靖韻、曾比特、龍婷、古淖文、譚輝智同顏米羔，陣容鼎盛。
 陳太邀請修哥嚟舉行個唱分享會。
陳太表示自己同修哥認識多時，佢話修哥充滿活力，肯提攜後輩，老、中青藝人都非常鐘意佢，仲經常會邀約對方一齊食飯，陳太希望修哥個唱長做長有，因每次能參予修哥嘅演唱會係一種幸運同福氣，而且修哥非常細心，好似佢上次喺香港同媒體聚餐發言時，唔記得戴佢嘅招牌墨鏡，修哥就即時同佢講。修哥寄語年輕人唔好怕由低層做起，最緊要對工作有熱忱，努力去做，自然會有成功嘅日子。
修哥話澳門有好多屬於佢嘅兒時回憶。
喺分享會上同時播放咗羣星祝賀視頻，當中林子祥同葉蒨文表示修哥超過 90 歲開個唱，真是無人能及，佢兩個更向修哥送上兩幅插畫，祝佢演唱會好風騒，呢兩幅插畫更由陳太同另一主辦單位代表鍾楚霖代佢兩個喺分享會現場上送比修哥；王祖藍話：「修哥真係勁呀，唔好話九十幾歲啦，我四十幾歲都未必開到一場個人演唱會，真係羨慕。」李思捷話：「我一定要去，咁好玩嘅 party 點可以冇我哋三隻福祿壽。」楊千嬅話：「恭喜修哥你又再開演唱會，你一直係我哋香港人一個好重要陪伴大家成長嘅人物，每一次你嘅演出也會為我哋注入正能量，永遠也很樂觀和積極。」王苑之話：「我想睇修哥喺台上載歌載舞、風度翩翩同大唱金曲。」龍婷話：「我也很期待同修哥合唱，good show。」大會亦揾嚟澳門當地市民同遊客為修哥個唱拍片打氣。
林子祥同葉蒨文向修哥送上兩幅插畫。