涂家堯賀歌迷會成立一周年 將推出新歌做悲歌王子

《中年好聲音》嘅唱將涂家堯同100位粉絲，齊齊慶祝fans club「涂寶G地」成立一周年，除咗粉絲熱情應援外，家堯嘅家人都有到場支持，另外仲有戰友丁文俊、顏志恒同埋林鉫徫都有嚟撐場。

家堯當然有唱返幾首歌答謝粉絲嘅支持啦，佢話見到歌迷會成立一周年都覺得好感動，所以呢日嘅聚會，佢話要隆重其事呀。

對於家堯嚟講，開心事真係一浪接一浪，因為嚟緊佢將會推出自己第一首歌，今次佢就挑戰做悲歌王子，至於會唔會參與埋MV演出？家堯就好謙咁話擔心會延誤拍攝過程呀，但如果真係要演出，佢話無問題，仲笑言可以呃多份糧呀。而同家堯老友鬼鬼嘅三位戰友，就好鬼馬咁模仿家堯嘅招牌動作，丁文俊就話點扮都唔及家堯咁靚仔呀。