星光路上丨與老公陳嘉輝相愛31年 梁小冰享受夫妻檔合作

梁小冰相隔26年，再同老公陳嘉輝夫妻檔合作《逆天奇案2》，呢次已經係佢哋第五次合作拍劇啦，梁小冰更為角色努力減磅，越嚟越Fit嘅小冰，呢日上嚟《星光路上》接受潘盈慧嘅專訪。

小冰講起自己90年參選港姐前，其實都做過模特兒，拍過廣告又演出過電影，所以參選港姐時，喺面對鏡頭時都無咁怯場，不過佢喺其中一個環節當中，就竟然失手跌咗頂帽，當時小冰強裝淡定，更以急才應對獲得全場掌場，成功摘下季軍寶座，之後小冰工作一個接一個，機會越嚟越多，第一部演出嘅古裝劇《血璽金刀》，戲份已經相當重，之後小冰大部分都係以拍古裝為主，因而被封為古裝美人。


而喺娛樂圈多年，小冰除咗演技越來越精湛之外，佢更覓得佢嘅Mr. Right，小冰因為同嘉輝合作劇集《孤星劍》而擦出愛火，兩人性格雖然南轅北轍，但係嘉輝細心體貼嘅一面，就令小冰徹底融化，兩人開花結果成夫婦，相愛31年，嘉輝對小冰仍然無變，都係咁體貼入微，令小冰覺得自己非常幸運，而兩人相隔多年，再有機會一齊演出《逆天奇案2》，小冰都話非常享受夫妻檔合作，更話一早頒咗個最佳拍檔獎比嘉輝，佢仲話嘉輝只要著上戲服，就散發住風度翩翩嘅一面，完全同家中嘅嘉輝形象大不同呀。