楊謹華自認係唱跳小學生 參加內地真人騷勇敢追女團夢

女星楊謹華近期忙於拍攝內地姐姐選秀真人騷，姐姐們唔止個個操得好fit，參加者要挑戰超高難度嘅跳唱舞台，楊謹華嘅初舞台經已被讚唱功唔錯，呢日佢喺台灣現身，透露自己當年爭啲就以女團身份出道，可惜最後冇成事。

楊謹華勉勵姐姐們大膽追夢:「人生很短，現在心裡想做的事情就要勇敢點頭去闖，不做不知道結果，(節目)剛開始的時候就似小學生一樣什麼都不懂，什麼都不知道，我就是去學，就算是累也是開心的﹐因為在做自己喜歡的事。」

謹華呢段日子為咗拍節目要長駐內地錄影同特訓，老公唔單止冇投訴，仲非常支持佢，謹華更大爆老公貼心舉動:「我哋有一個半月沒有肢體接觸， 抱歉有時忙到沒有回他的訊息，如果失聯一兩個小時，他就會找工作人員詢問我的情況，有沒有休息，有沒有吃東西之類。」

過往謹華曾透露同經營石油公司嘅老公Ben相當恩愛，唔止成日二人世界去旅行，婚後五年時都幾乎每日親親，依家成日分隔兩地，相信謹華為咗追女團夢真係犧牲唔少。