余綺霞母親離世享年99歲 生前獲賈思樂林建明晚輩疼錫

余媽媽安息! 1977年《香港小姐》季軍余綺霞嘅媽咪喺今日傳出離世消息，享年99歲。余媽媽生前獲不少霞女嘅好友賈思樂、林建明，以及傳媒界友好探望，疫情前不時跟大家食飯聚舊，雖然余媽媽年時已高，但精神好好，腦筋轉數快，每次聚會都言談甚歡。直至今年三月份時，余媽媽因行動不便，未能跟大家慶祝99歲生日，直至今年母親節前夕，就傳出離世消息。

霞女喺1977年當選後參與劇集、電影同司儀工作，亦係當年《歡樂今宵》台柱之一。喺1988年於澳洲拍攝外景時，與賈思樂、麥麗紅(後改名麥景婷)及程思俊一齊遇上車禍，霞女昏迷一個月後甦醒。喺1990年嘅母親節，霞女現身節目《媽媽．真的愛您》，親身答謝余媽媽喺佢人生最艱難嘅時候，對佢不離不棄嘅照顧，令佢感受到母愛嘅溫暖同偉大。可惜佘綺霞1990年不幸證實患上鼻咽癌，直至1993年離世，終年36歲。