胡杏兒古裝造型柔美被稱「古典夫人」 為與家人相聚不惜變空中飛人

視后 胡杏兒 有份參演嘅內地劇集《惜花芷》播出後熱度不斷，近日終於迎來大結局。劇集圍繞一個落難大家族，一家人要拋下成見同心協力重振家族名聲，而杏兒飾演嘅三夫人夏金娥，性格精於算計帶點勢利，但亦非常明白事理，加上角色造型柔美優雅，深得劇迷喜愛，令杏兒被網民改名叫「古典夫人」。

杏兒參演嘅內地劇集收視不俗，佢嘅角色仲被觀眾稱為「古典夫人」

得到觀眾好評嘅杏兒都相當開心：「呢個角色一開始都幾潑辣，口硬心軟，觀眾鍾意我演呢類比較氣勢強勁嘅角色，睇完感覺好爽，其實我都鍾意演呢類角色，有得同人鬧下交吖嘛。我都希望香港嘅觀眾可以睇到，始終自己有一段時間冇拍古裝。

拍攝時秦沛又曾特地探班支持
 
回想上年拍攝點滴，杏兒最難忘就係同張婧儀、胡一天、高雄等一眾演員相處嘅快樂時光，喺煞科時大家都好唔捨得彼此。而當時杏兒更得到同樣身在橫店嘅秦沛專程探班，令佢非常感動。另一樣令杏兒深刻嘅，就係劇集拍攝時正值炎夏：「我哋好多時都係喺廠入面拍攝，雖然有冷氣，但係你著住闊袍大袖，梳住個古裝頭，戴上頭飾都真係幾熱，唯一好處就係可以流汗幫手減肥，哈哈。」而作為三子之母嘅佢更不時要化身做空中飛人，穿梭橫店、香港，同老公以及三個寶貝仔見面，不過見劇集獲得好評，佢都覺得一切都非常值得。

雖然杏兒當時要穿梭香港同橫店，不過好一段時間未拍古裝嘅佢依然非常享受
 
喺內地持續高企嘅杏兒目前仲未可以休息，因為現時同步接拍兩套劇集，分別係同羅晉合演嘅《時差一萬公里》，以及同孫儷演出嘅《三十九二十八》，呢次亦係二人7年前合演大熱劇《那年花開月正圓》之後，再次同框演出，早前開拍消息一出，即時牽起劇迷集體回憶，大家都非常期待兩位視后再一次互鬥演技！