香港婚後事丨豹嫂自爆激到豹哥要睇醫生 羅天宇回應被封「女神收割機」

單立文（豹哥）同胡蓓蔚（豹嫂）係圈中公認嘅恩愛夫妻，相愛28年依舊甜蜜到令人羨慕，9號晚播出嘅《香港婚後事》請到呢兩公婆嚟做嘉賓。
今集請嚟豹哥豹嫂做嘉賓。
身為「單身狗」嘅羅天宇請教佢哋點樣可以令愛情保鮮？豹哥就拋出婚姻哲理：「婚姻係兩個人三唔識七喺埋一齊，之後產生一種化學作用叫愛情，之後到你Commit要照顧一生一世，講就易囉，當你途中遇到咁多嘢嗰陣，你個心會唔會動搖？會唔會想放棄？你要重拾正軌去鞏固返個婚姻係好艱難，一段婚姻共富貴係好容易，共患難就唔容易。」
豹嫂自爆激到豹哥要去睇醫生。
豹嫂就話最近因一事而令佢有新領悟：「最近我激親我老公，激到佢睇醫生，原本係好小事，但大家喺度互頂，佢話：『你收聲！』我話：『我好冷靜，你有咩資格叫我收聲，我做咩要收聲，我依家叫你收聲！』之後佢個胃就唔舒服，個肚好多氣，Gur咗幾日，跟住佢去睇醫生，食咗兩個月胃藥。」豹哥笑言：「佢依家好似好輕描淡寫，但當刻係好挑釁！」豹嫂自認性格比較直和倔，但經此一役後學識對老公要溫柔啲。
 節目入面豹哥大方提及當年拍三級片嘅經歷。
豹哥、豹嫂拍拖12年後先走入婚姻殿堂，問到佢哋當時點解想結婚？豹嫂坦言：「係我同佢講結婚嘅，當時好多朋友都係做藝術方面嘅工作，佢哋話結婚生仔冇可能，點知一講完佢哋就結咗婚，之後再生咗兩個小朋友。之後我去探我個朋友，佢好語重心長同我講，其實你哋都要諗諗係咪要結婚，之後我返到屋企，我就話邊個話我哋係咪要結婚呢，佢聽完之後就話好呀。」而豹哥就覺得結婚並唔係一件大不了嘅事，簽咗一紙婚書並唔代表你會一生一世愛呢個人，豹哥指結婚呢個形式係做畀啲老人家、朋友睇，只係一場大龍鳳嚟。至於講到婆媳關係，豹嫂大讚奶奶非常開明，從來都唔會畀壓力佢。
 豹哥覺得一紙婚書唔代表啲咩。
豹哥有「西門慶專業戶」嘅外號，節目入面豹哥大方分享拍過三級片嘅過去：「蔡瀾當初簽咗我三部（電影），佢話第一套冇嘢㗎，係個書生喺度打啲妖咁，Lur住帶過咁囉。」豹哥坦言冇後悔過拍愛情動作片，佢覺得應承咗要做，就要努力做好佢，豹哥雲淡風輕拋下一句：「都係歷史人物啫，冇咩大不了！」
羅天宇大談被封「女神收割機」一事。
節目尾聲，豹哥矛頭直指有「女神收割機」之稱嘅羅天宇身上，追問佢對婚姻有沒有憧憬？天宇仲會喺節目中講下自己對呢個封號嘅感受。

《香港婚後事》逢星期四、五 22:30 翡翠台