港新娘五星酒店辦婚禮卻被安排「14樓」出閣　事主列3宗罪直斥：當客乞丐

新婚大日子本應開開心心，但近日有一位香港新娘在網上吐苦水，表示因為酒店不當安排，而令他們感到不尊重，影響「big day」心情不特止，更公開列出酒店3宗罪直斥「當客乞丐」。此外，目前酒店一方仍未有任何回應。

女事主日前在社交平台發長文怒轟酒店「3宗罪」，她表示自己花了「六位數字」在尖沙咀一間五星級酒店辦婚禮，包括出閣加擺酒，結果換來一肚氣。

第1宗罪：婚禮當日被安排「14樓」出閣

事主透露首宗罪，指在當日辦理入住時，酒店表示原定的套房未能即時提供，要求他們改入住14樓的房間，理由是需要時間鋪設「紅床單」。然而，當事主進入14樓套房後，卻驚訝地發現床鋪仍然是「白床單」，進一步加深她的不滿情緒。

她說，「前台話原定畀我哋間房，要夜晚六七點先ready，要我哋轉吸煙樓層或者14樓」。最後女事主感到非常無奈，「焗住要咗14樓咁(唔)好意頭嘅出門套房」，又指到達check in時間仍要再遲半小時才能交房，「結果當晚所有流程儀式都遲咗半個鐘」。

第2宗罪：職員對曱甴視而不見

事主又發表第二宗罪，直指酒店衛生不行。她表示，與一眾兄弟姊妹外出拍攝後回到酒店，途中於酒店大堂發現一隻蟑螂，正大搖大擺地四處爬行。然而，酒店大堂的工作人員對此完全無動於衷，只是旁觀蟑螂活動，未有採取任何行動。

而且當時正接近晚上6時，正值晚宴迎賓的時間，「好彩我擺午宴無賓客見到，如果俾長老同其他賓客見到真係俾人講一世，喺曱甴酒店擺酒」。

第三宗罪：當客乞丐

第三宗罪令女事主直斥酒店態度輕視、服務敷衍。她表示，婚宴當晚曾向當值經理投訴大堂出現蟑螂，對方回應需透過CCTV核實情況，但直至退房時仍未收到任何回覆。

翌日，她通過電郵再次向酒店投訴，酒店方才致電回應，指「(酒店)Trainee唔識嘢，搞砸我哋人生大事」，並提出補償2人自助餐以求平息事件。然而，女事主對此表示強烈不滿，批評酒店「當客乞丐」。她當即拒絕後，酒店再加碼補償，提出合共4位自助餐的安排，卻仍未能平息女事主的不滿情緒。

事主全文：

香港婚禮 警世文

各位搵緊場地嘅準新人，奉勸你哋唔好揀XXXXXXXXX Hotel，以下係港女親身極不愉快經歷😡😡

1️⃣逼人用14樓出門，仲要遲俾房
Big day前一日早上11點到酒店，前台話原訂俾我哋間房要夜晚六七點先ready ，要我哋轉吸煙樓層或者14樓，正常新人都唔會俾長輩同兄弟姊妹食二手煙，而前台當時確定14樓一定可以準時3點拎房，就焗住要咗14樓咁好意頭嘅出門套房，點知check in時間返到酒店都仲！未！有！房！最後等多半個鐘先有房，結果當晚所有流程儀式都遲咗半個鐘🫠

2️⃣職員對🪳視而不見
我哋同兄弟姊妹外影後返酒店，喺酒店大堂見到有隻🪳大搖大擺咁行緊，我哋嚇到嘩曄聲，兼拎哂電話影相拍片，酒店大堂職員食花生咁望住隻🪳（片一），完全無動於衷，當時近傍晚6點晚宴迎賓時間，好彩我擺午宴無賓客見到，如果俾長老同其他賓客見到真係俾人講一世，喺🪳酒店擺酒


3️⃣當客乞丐，大話連篇
我哋當晚向當值經理反映第2️⃣點，但佢話要睇cctv 核實，到check out都無人覆我，第二日email酒店，酒店電話覆Trainee唔識嘢，搞砸我哋人生大事，送2人buffet就想了事，當我哋丐衣？我拒絕就加碼送多2個，我唔接受仲反映埋第1️⃣點(寫email時太嬲無寫到)，酒店解釋話要鋪紅床單，五星級酒店要用4.5小時鋪床單已經夠離譜，更離譜係張床單根本唔存在（圖二）！明明話一定可以準時俾房，點知都係遲，個理由仲要唔成立😤講大話俾我踢爆就話送6人buffet，衰一樣野就送2個buffet，街市講價？五星酒店就係咁對自己個brand？
各位準新人唔想花六位數字擺酒換來一肚氣嘅話，千祈唔好揀呢間酒店，最後祝大家百年好合，一切順利

網民：好奇點解會揀呢間

事件引起不少網民熱議，有人不解為何事主會選擇該酒店，事主回應「地點方便+食物好食（唯一優點）」。

亦有人認同事主，指該酒店存在不少問題，「好耐之前去過staycation一次 通風系統好差 好多塵搞到敏感 訓唔太到」、「早排去朋友飲宴 播成長片段隔幾秒個螢幕就黑mon 而我坐個個位有少少侷」、「後面個位員工好驚下wo」、「當年疫情staycation，成間房勁暗又有陣噏味，馬桶仲要沖左一次就塞左」、「咩年代啊，d裝修咁90年代」、「肺炎時期家族食飯去食過一次自助餐，可以話普通到唔再普通」、「地下有隻小強...」、「警世警世警世」。