失物重獲，往往令人感動不已。近日有港男在討論區上，分享一段暖心經歷，指自己在乘坐小巴時不慎遺失銀包，原以為難以尋回，卻意外地被一位港媽拾獲銀包，最終失而復得。
港媽醒目用轉數快留電話
事主在討論區發文，他以「我諗真係得香港人先可以做到咁高質素」為題發文。他表示，這位媽媽在銀包中找到事主的銀行卡，靈機一動，透過「轉數快」向事主轉賬一元，並在交易備註中留下聯絡方式。
最後，事主在社交媒體的失物群組中看到相關訊息，成功聯絡上對方，感激之情溢於言表。最後，事主又表示，「有比錢佢但佢堅持唔收」；他亦在帖文中表示，「喺呢個咁冷酷嘅社會，仲可以感受到人間溫暖」，並反思自己是否也曾為他人做過類似的好事。
網民：港媽方法有效又貼心
事件引起網民熱烈討論，不少人讚揚該媽媽的機智與善心，認為她的做法既有效又貼心；亦有人表示，雖然社會上常有偷竊事件，但這類善行仍值得讚賞與推廣，「FPS 1 蚊留contact呢個真係諗唔到」、「呢d好人好事應該推上報」、「呢個幾醒」、「香港人有愛」、「值得嘉許」、「個媽媽真係幾聰明」、「好人一生平安」、「香港人幫人都用最有效率最可靠方式」、「唔講佢好心，剩係講佢識得咁樣留資料係好醒」、「又學到嘢」、「一定有學識有教養」、「真係有教養 好人一生平安」、「呢個媽媽好人又有腦」、「估唔到仲有咁好嘅人」、「欣賞佢呢種香港人先有咁有效率既交收方法」、「FPS入錢比你為咗比contact你搵返佢真係幾醒」。
帖主原文：
我諗真係得香港人先可以做到咁高質素
話說小弟今日搭小巴跌咗個銀包
正當我喺小巴站搵咗成個鐘之後
已經打定輸數
然後喺Facebook啲失物群組搵到
係一個好好人嘅媽媽執到
見到面先知原來喺我好徬徨周圍搵嘅時候，
佢執到我銀包，搵到我張銀行咭
專登fps 左一蚊俾我
仲喺Remarks留低咗佢聯絡方法俾我
嗰刻真係覺得好感動
雖然成日講香港人幾咁功利
但喺路不拾遺方面，真係得香港人嘅公民意識可以咁高
喺呢個咁冷酷嘅社會
仲可以感受到人間溫暖
令我自己都有反省下
平時有冇對其他人做過呢啲好事
To 嗰位有愛心嘅媽媽
好多謝你同阿女嘅熱心幫忙
我祝你全家同埋隻狗狗健健康康#hoho#
好人有好報
仲有好多謝嗰幾位熱心嘅小巴司機
希望你哋會睇到呢個post